مشاعر

كيفي أحبك وأعشقك موت وأغليك
يعني بكيفي ياحبيبي هويتك
أعطيك وأخذ منك أكثر من أعطيك
متملكك كلك ولو ما شريتك
أخذك من ناسك وأجيبك واوديك
وتنسى جميع الخلق لامن دعيتك
أعاندك وأزعلك وأمشي وأخليك
وأدري بأني لا بغيتك .. لقيتك
أجيك لامن ضقت وأقول وش فيك
وترضى بدون أعذار لاني نصيتك
طيب وطيبة قلبك أصدق معانيك
حبوب ما ألقى مثل قلبك .. فديتك
علمتني شوقك وعشقك وطاريك
وبليت في حبك مثل ما ابتليتك
لاتلومني .. لا غبت عني بناديك
ولاتلومني .. لا صحت .. وينك وجيتك
غالي حبيبي جعل ربي يخليك
وينساني الله كان رحت ونسيتك
أكذب عليك إن قلت كيفي ترى أغليك
ماهو بكيفي غصب عني هويتك